قوانين المنتدى .... مشرف عصبى شوى

دى كانت قوانين احد المشرفين مش توتا طبعا

1- عضويتك تبقي بأسم محترم و ابن حلال و يا ريت تكون بالعربي مش هقرف نفسي و أقعد أترجم انا و إلا هتتوقف و أي حد مش عاجبني اسمه هيتوقف
2- أي رد مفهوم أو غير مفهوم هتتوقف
3-تشارك وانت ساكت
4-... قسم الفرفشة والنكت تكتب تعليق و انت ساكت و مش عاوز ضحك
5- قسم المسابقات تلعب من غير أي هزار
6- ماتقعدش فاتح المنتدى طول اليوم عشان متضغطش علي السيرفر سيب فرصة لغيرك عشان يتنيل يدخل
7- أي موضوع مكرر أو منقول أو حتي جديد يحذف فورا
8- قسم الشكاوي مشوفش فيه موضوع واحد و إلا تتوقف
9- تخليك في حالك و متتكلمش مع حد من الأعضاء جوة المنتدى أو برة المنتدى
10-ممنوع أي هزار أو تعارف أو تهنئة
11 - مفيش اقسام للافلام للاجنبي علشان نشجع الفيلم العربي و الصناعة المحلية
12 - مفيش اقسام للافلام العربي علشان دي مغرقة الدش اتفرج في التلفزيون يا خويا
13 - مفيش اقسام للاغاني الاجنبي علشان كلها رقع و خبط و انا موش فاهم حاجة
14 - مفيش اقسام للاغاني العربي علشان مزاجي كده
15- دخول المنتدى والخروج منه بمواعيد هي سايبة ولا ايه؟ وممنوع حد ينط لي من فوق الفاير وول لأني هجيبه هجيبه وهيتوقف .
16- وأنا مش عامل مواضيع انا مش خدام عندكوا.
17- قسم طلبات الأعضاء مش عاوز أشوف فيه كلمة والا هتتوقف ما انا مش قاعد على أدكوا ..
18- ممنوع كتابة أي موضوع أو عمل ردود من غير اذن مني ....ليه بقى؟ أهو رخامة وخلاص و المعترض علي القوانين دي يخبط دماغه في الشاشة بتاعته
ملحوظة: سواء خالفت القوانين أو لأ فدي مش مشكلتي هتتوقف يعني هتتوقف ماشي يا سيدي؟؟