مصرى اصيــــــــــــــــــــل

---

واحد راح يبات هو و المدام فى الهيلتون ليلة

تانى يوم الصبح بيطلب من موظف الاستقبال الحساب و دار بينهم هذا الحوار :

الرجل : الحساب كام من فضلك ؟

الموظف : 1000 جنيه بس يافندم

الرجل : ألف جنيه ليه يا أستاذ ... كتير قوى مبلغ ألف جنيه فى ليلة

دى كانت ليلة واحدة يا محترم

الموظف : أجرة المبيت فى الليلة بـ 400 جنيه

الرجل : طب و الـ 600 جنيه الباقيين ليه بقى إن شاء الله ؟؟

الموظف : عندك 100 جنيه أجرة الموظفين اللى بيشيلوا الشنط

سيادتك لما نزلت من التاكسى مش كان فيه شيالين بيشيلوا الشنط منتظرينك ؟

الرجل : أما غريبة و الله ... بس أنا شيلت الشنطة بنفسى و ماحدش شالهالى

الموظف : ماهو كانوا موجودين قدام سعادتك .. ما ناديتش عليهم يشيلولك الشنطة ليه ؟؟

الموظف مستطرداً... هاكمل لحضرتك باقى المبلغ

عندك 50 جنيه إستعمال سجاجيد! السجادة اللى من غرفة حضرتك للمطعم

الرجل : أنا ما مشيتش على سجاجيد أنا كنت بامشى على الحتة الفاضية اللى مش مغطياها السجادة

الموظف : ماهى السجادة كانت عند سعادتك .. ما مشيتش عليها ليه ؟؟

الموظف : و عندك 200 جنيه إستخدام حمام السباحة

الرجل : بس احن ا ما نزلناش عومنا فى الحمام خالص .. هوا احنا وش عوم و مايوهات

الموظف : حضرتك حمام السباحة كان قدام سعادتك ما نزلتوش عومتوا ليه ؟؟

الموظف : و عندك 100 جنيه إستعمال التليفزيون و قنوات الدش و الريسيفر فى الأوضة

الرجل : دش أيه اللي أنت جاى تقول عليه !

إحنا ما شغلناش امبارح غير القناة الأولى و الثانية .. هوا كان فيه دش!!

الموظف : قنوات الدش كلها كانت عند سعادتك ما اتفرجتش عليها ليه ؟

الموظف : و عندك 150 جنيه إستعمال سخان الميه اللى بالكهربا فى الأوضة

الرجل : الدنيا كانت حر أصلاًُ و ما أستعملناش السخان فى حاجة

الموظف : مالناش دعوة .. السخان كان عند سعادتك ما إستعملتوش ليه ؟؟

الرجل : أما شيىء سخيف أوى

انتظر الرجل للحظات ثم أخرج له 400 جنيه فقط

الموظف : دول 400 جنيه بس

الرجل : الـ 600 جنيه الباقية حق معاكسة المدام بتاعتى

الموظف : ايه الكلام الفارغ ده ... حضرتك عاوز تجيبلى مصيبة

هوا أنا عاكست المدام بتاعتك خالص و لا جيت جنبها !!

الرجل : ما كانت قدامك امبارح ما عاكستهاش ليه ؟؟